خەلەکا ٤٧
ل ڤێ خەلەکێ ژی، کا دا ھندە زاراڤ و ئیدومێت دی بینینە ناڤ بەحس و خەبەران پتر گرێدای زانستێ جیولوجی و جیومورفۆلوجی، لێ گەلەک ب سڤکی و ڕەوانی دا کو ل بەر خواندەڤایێ ئاسایی ب زەحمەت نەکەڤیت.
١– زویر: پێکھاتەکا جیولوجی یە، وەک چیا ڕێز و درێژ دبن لێ ژچیا نزمترن و پێکھاتەکا تایبەت ژ ئاخێ و خیزی و خڕەبەری و جەھجویری پێک دھێن.
نموونە:
ا- زویرێت پشتا ماڵتایێ (ھۆڵا کۆنفرانسا و سەنتەرێ ڕۆشنبیری یێ زانکۆیێ ل سەر ئاڤاکرینە).
ب- زویرێت پشتا مانگێشکێ دەڤەرا دۆسکی یا.
ج- زویرێت ناڤبەرا ئاکرێ و زێی دەڤەرا سورچیا.
٢–مل: دبندا نھاڵە و پارچەکە ژ پێکھاتەکا مەزن، دبیت لایەک بەتەن بیت و ل سەر کەتنێ دێ گەھیتە سەر ملێ.
٣–باسک: ژ ملێ نزمترە و دیسان پارچەکە ژ پێکھاتەکا مەزن.
٤– زینی: وەکی زینێ ھەسپی یە، ھەردوو مل بەتەنن و دوو رەخێت بلندن، باراپتر ل پێکھاتا چیا پێش چاڤدکەڤن.
٥–سویار: دیسان ھەردوو مل بەتەنن و سویار ژ زینیا دبیت نزمتربن لێ بو ڕێ بەرفرەھترن، نموونە: سویارا ئێتویتێ، ڕۆھلاتێ دھوکێ، سویارا تویکا (ھاڤینگەھا سویارەتویکا) ، سویارێ (گوند سویارێ).
ل دوی ڕکاتیێ (حسب المیل – slope) ب ڤی ڕەنگی ناڤ دھێتە گۆتن.
١- بەربەتەن: گوشە ل ناڤبەرا (١٠-١٥) پلە.
٢- بەتەن: گوشە ل ناڤبەرا ( ١٥-٣٠) پلە.
٣- پەسار: گوشە ل ناڤبەرا ( ٣٠-٤٥) پلە.
٤- دوڕبە: گوشە ھەتا (٧٠)ێ پلە ژی دچیت.
٥- ھەلەمویت: گوشە ھەتا ( ٨٠)ێ پلە ژی دچیت.
٦- زنار: گوشە یاژپێرڤە ھەتا(٩٠) پلەیە. وەک زنارێ کێستە، ڕەق و ڕەق ڕاوەستایە.
تێبینی: ڕک واتە (میل – Slope ).
