کۆڤارا “په‌یاما زانکۆیێ” کۆڤاره‌کا زانکۆیی یه‌ ژلایێ ڕێڤه‌به‌ریا ڕاگه‌هاندنا زانکۆیا دهۆک ڤە ده‌ردکه‌ڤیت، د هژمارا خۆ یا هەیڤا کانووینا دووێ یا سالا ۲۰۱۸ێ دا هه‌ڤپه‌یڤینه‌ک دگەل مه‌روان فندی ڕێڤه‌به‌رێ ڕێڤه‌به‌ریا ژمێریاری ل زانکۆیا دهۆک کریه‌، فندی ئینفۆ وێ هه‌ڤپه‌یڤینێ دووباره‌ ل ڤێرێ به‌لاڤه‌دکه‌ت.

رێڤەبەرێ رێڤەبەریا ژمێریاری ل زانکۆیا دھۆک
بەرێز مەروان فندی:

سندوقا داھاتێ زانکۆیێ ب سەرپەرشتیا سەرۆکێ زانکۆیێ یە و بارسڤکی ل سەر میزانیا زانکۆیێ ئەوا ژلایێ حکومەتێ ڤە دھاتە تەرخانکرن پەیداکریە

پەیاما زانکۆیێ:
رێڤەبەرێ رێڤەبەریا ژمێریاری ل زانکۆیا دھۆک مروان فندی بۆ گۆڤارا پەیاما زانکۆیێ دیارکر کو ئەو نوکە ل دویف رێنمایێن ٨٦ یێن سالا ٢٠١٦ کارێن خۆ ئەنجام ددەن و ھەر ژ ١/٩ و ھەتا نوکە کار پێ دھێتە کرن وەکو سندوقا داھاتێ زانکۆیێ و گەلەک بارێ میزانیا زانکۆیێ یێ سڤک کری و گۆت ل سەر میزانیا گشتی یا ھەرێمێ ژی بارسڤکیەک یا پەیدابووی چونکو گەلەک کارێن خۆ ئەم ل دویف ڤان رێنمایان ب رێڤە دبەین و ل زانکۆیا دھۆک ئەڤ سندوقە ب سەرپەرشتیا سەرۆکێ زانکۆیێ یە.

{ل سالا بۆری ژ داھاتێ سندوقا زانکۆیێ ب کۆژمێ دوو ملیار و سەد ملیۆنان کارێ ئاڤەدانکرنێ ھاتیە کرن}

مروان فندی ھەروەسا گۆت یانێن کۆلیژێن زانکۆیێ و سەنتەران یێن داینە ب کرێ و ھەروەسا پارێ ژ داھاتێ قوتابیێن ئێڤاران و پەرالێل ژی بۆ زانکۆیێ دھێت دچیتە د حسابا زانکۆیێ دا وەکو سندوقا داھاتێ زانکۆیێ و ژ ڤی داھاتی ٢٣% ددەنە گەنجینا ھەرێمێ وەکو داھات و ٧% ژی ددەنە دیوانا وەزارەتا خواندنا بلند و ٧٠% ژی بۆ زانکۆیێ دمینیت بۆ ب رێڤەبرنا کارێن زانکۆیێ ل گەل کۆلیژا و رێڤەبەریێن ب سەر زانکۆیێ ڤە، دیار ژی کر کو ل سالا بۆری یا خواندنێ نێزیکی سێ ملیار دیناران بۆ زانکۆیێ ژ ڤی داھاتی ھاتن، ژ وی پارەی ژی نێزیکی ٩٠٠ ملیۆن دیناران دانە گەنجینا ھەرێمێ و دیوانا وەزارەتا خواندنا بلند، دوو ملیار و سەد ملیۆنان ژی کار یێ پێ ھاتیە کرن، ھۆلێن خواندنێ یێن پێ ھاتینە چێکرن ل کۆلیژا ئەندازیاری پشکا میکانیک و بایێ ٢١٣ ملیۆنان ژی شەش ھۆلێن دیتر یێن ئاڤاکرین ل کۆلیژا پەروەردا بنیات، ب ٧٦ ملیۆنان ژی ھۆلێن ل کۆلیژا پەرستاری ھاتینە ئاڤاکرن و ب ٢٣٠ ملیۆنان ژی کافتریایێن کۆلیژا دەرمانسازی پێ ھاتینە چێکرن کو دبنە نێزیکی ملیارەکا دیناران و ب وی پارێ مایی ژی کریێن وانێن ئێڤاران پێ ھاتیە دان و گەلەک خەرجیێن دیتر یێن پێ کرین وەکو کرینا ئەساسی بۆ پشکێن ناڤخۆی.
رێڤەبەرێ رێڤەبەریا ژمێریاری ل زانکۆیا دھۆک ھەروەسا دیار کر کو ئەڤ سالە ژی کۆلیژا زمانان ھاتیە ڤەکرن و ژ پارێ داھاتێ سندوقا زانکۆیێ گەلەک ئەساس یێ بۆ کری، ھەوەسا ھندەک تاقیگەە ژی ل کۆلیژا زانستێن تەندروستی ھاتینە چێکرن، پشتی ھندەک پشکێن زانستی ل کۆلیژا پەروەردا ئاکرێ ئاکرێ ژی ھاتینە ڤەکرن ھندەک تاقیگەە یێن بۆ چێکرین و نێزیکی ٧٠ ملیۆن دینار یێن لێ ھاتینە مەزاختن و ب کۆژمێ نێزیکی ٧٠ ملیۆن دیناران دوو ھۆل یێن ل نێزیکی یاریگەھا کۆلیژا پەروەردا وەرزشی ئاڤاکرین ل گەل دەستشۆ و پێدڤیێن وان بۆ قوتابیان و ئەڤە ھەمی ژ سندوقا داھاتێ زانکۆیێ ھاتینە خەرج کرن.

{بودجا زانکۆیێ ٤٠% ھاتیە کێم کرن}

مروان فندی گۆت ژی مە ١٤ دکان یێن ناڤ بازارێ دھۆکێ ھەین و داھاتێ وان ژی بۆ زانکۆیێ دھێت و پێنج بۆرجێن تێلەفونان ژی داینە ب کرێ و داھاتێ وان بۆ زانکۆیێ دھێت و د چنە د سندوقا داھاتێ زانکۆیێ دا، ئەو ژی دیارکر کو ڤی داھاتێ سندوقا زانکۆیێ بارسڤکی یا ئێخستیە سەر میزانیا بۆ زانکۆیێ دھێت ژ لایێ حکومەتا ھەرێمێ ڤە چونکو ئەڤ میزانیە ژ ھەیڤا ئێک یا ٢٠١٧ ب رێژا ٤٠% یا ھاتیە کێم کرن.

{گەنجینا ھەرێمێ پێ باشە زانکۆ ژ وی داھاتێ بۆ دھێت خۆ ب رێڤە ببەن}

ئاشکرا ژی کر کو گەنجینا ھەرێمێ بۆ زانکۆیێ دیارکریە ھەکە زانکۆ دێ شێت ژ داھاتێ خۆ یێ بۆ سندوقا زانکۆیێ دھێت بشێن خۆ پێ ب رێڤە ببەن ئەم دێ ھەوە ژ بەھرا خۆ یا ٢٣% لێبۆرین ژ زانکۆیێ وەرناگرین، کو میزانیا زانکۆیێ بھێتە راوەستاندن بۆ تێست بۆ ماوێ سالەکێ یان دوو سالان ل بن چاڤدێریا وان ڤە ھەکە زانکۆ بشێت ئیدارا خۆ بکەت دێ ٢٣% ب زانکۆیێ ھێلن و ئەو ب تنێ دێ مووچێن فەرمانبەر و مامۆستایان دەن، بەلێ خەرجیێن دیتر ناھێنە دان، مەروان فندی گۆت ئەز دبینم ل دویف ڤی دەست و داری سال بۆ سالێ دێ باشتر بیت چونکو ل سالا بۆری ب تنێ ل قووناغا ئێکێ مە قوتابی ھەبوون و ئەڤ سالە دێ دوو قووناغ ھەبن و سیستەم ژی پتر یێ دبیتە پەرالێل و دێ پتر مفا ژێ ھێتە وەرگرتن، سەخبێری ژی بەردەوام یا دھێتە کرن و نەھاتیە راوەستان ھەر ژ سندوقا داھاتێ زانکۆیێ یە.

{قوتابیێن پشکێن ناڤخۆی ئەڤ سالە ب تنێ تەئمینات ژێ ھاتنە وەرگرتن}

ل دۆر قوتابیێن پشکێن ناڤخۆی و ئەو پارێ ژێ دھێتە وەرگرتن رێڤەبەرێ ژمێریاریا زانکۆیا دھۆک گۆت ل سالا بۆری یا خواندنێ ھەر قوتابیەکێ پشکێن ناڤخۆ کۆژمێ ١٠٠ ھزار دیناران ژێ ھاتە وەرگرتن وەکو داھات بۆ زانکۆیێ ما بەلێ پتر ل سەخبێریا وان پشکا ھاتە خەرج کرن، بەلێ ل سالا نوی یا خواندنێ ٢٠١٧-٢٠١٨ ل دویف بریارا وەزیرێ خواندنا بلند بریار ھاتە دان کو قوتابی بھێنە لێبۆرین ژ ڤی کۆژمی چونکو رەوشا دارایی نەیا باشە و ب تنێ ٥٠ ھزار وەکو تەئمینات ژێ ھاتنە وەرگرتن و ل ھەیڤا پێنج یا سالا ٢٠١٨ ئەڤ تەئمیناتە جارەکا دی دێ بۆ قوتابیان ھێنە زڤراندن.

{دۆرێن ٣٣٠٠ فەرمانبەر و مامۆستا ل زانکۆیا دھۆک ب سیستەمێ بایومەتری ھاتنە تۆمار کرن}

ل دۆر سیستەمێ بایومەتری مەروان فندی دیار کر کو شەش ھەیڤان وان کار ل سەر ڤی سیستەمی دکر و دئەنجام دا ٣٣٠٠ فەرمانبەر و مامۆستا ل زانکۆیا دھۆک ب سیستەمێ بایومەتری ھاتنە تۆمار کرن کو ئەون یێن دامەزراندیێن ھەمیشەی و ٥٠٠ کەس ژی گرێبەست ھەبوون ل زانکۆیێ و وان ژی ب سیستەمێ بایومەتری یێ خۆ تۆمارکری کو ل سەر ١٠ یەکەیێن ژمێریاری ددابەش کری بوون، کو ل زانکۆیا دھۆک ١٠ یەکەیێن ژمێریاری یێن ھەین بۆ ب رێڤەبرنا کارێن کۆلیژان کو بەری نوکە سیستەم فاکۆلتی بوون و ئەڤ یەکە ب ناڤێ فاکۆلتیان کاری ب رێڤە دبەن.
ل دۆر چاوانیا بکرێ دانا یانێن کۆلیژان و کارتێکرنا وان ل سەر بھایێن خارن و ڤەخارنان ل زانکۆیێ مەروان فندی گۆت یانێن کۆلیژان ب رێکا لژنا تەخمینی کو ژ پێنج کەسا پێکھاتبوو ھەروەسا لژنا دانا ب کرێ ل گەل نینەرێ گەنجینا دھۆکێ ب رێکا سەرئێک زێدەکرنێ دانە ب کرێ و داھاتێ وان بۆ سندوقا داھاتێ زانکۆیێ نە و د رێنمایان ژی دا بھایێن وان د نەگۆرن و نابیت دەستکاری د بھایان دا بھێتە کرن، بۆ نموونە کەرەستێن خارنێ وەکو کێک و شەربەت د ڤێت وەکو بازاری بھێنە فرۆتن و نەزێدەتر و خارنان ژی ھەمیان بھایێن وان د دیار کرینە، ھەر کۆلیژەکی ژی لژنەک یا ھاتیە پێک ئینان کو دویفچوونێ ل سەر بھایان بکەت و دەمێ گازندەک ھەبیت ئەو لژنە بگەھینیتە سەرۆکاتیا زانکۆیێ.

__________________________________________

کۆڤارا پەیاما زانکۆیێ، هژمار ٢٢، کانووینا دووێ ٢٠١٨، بەرپەر ٣٨،٣٩،٤٠