خه‌له‌كا 4
ديسان د كورمانجى يا مه يا خوه‌ش و شرين دا ئه‌م دزانين: (گو) ڕامانا (ته‌په = كره) دئێت، ئانكو (گووانێ =ته‌پانێ= كره القدم)، ئه‌ڤ په‌يڤا ره‌سه‌نا (گو) د كورمانجى دا باراپتر ل پێشيا هه‌ر په‌يڤه‌كێ بهێت، ئه‌و تشت يێ (خڕ)ـە، واته (دائري) يان (خڕوخڕ)ـە، واته (كروي)، ئه‌م ل ڤان په‌يڤان بنێرن ( گوندور، گوهيشك، گوروێل، گوزك(1)، گوزه‌ك، گوپال، گوڤه‌ند، گويز، گويزان(2)، گوول(3)، گوستيرك، گومبه‌ت، گولولك(4)، گوهـ(5)). ڤان په‌يڤان هه‌ميان سه‌ر و شێوه‌كێ ( بازنه‌ى و خڕ و گوروڤر) يێ هه‌ى، هه‌ر چه‌نده هنده‌ك ناڤ و په‌يڤێن دى يێن هه‌ين (دبيت) ئه‌ڤ (گو)ه پارچه‌ك بيت ژ په‌يڤێ يان ئه‌و ژى وه‌كى يێت سه‌رى بن وه‌كى (گوند، گوڤ، گوشت، گول، گوره)، چونكى باراپترا شێوێ گوندى به‌ره‌و بازنه‌ى و خراتيێ دچيت هه‌روه‌سان (گوڤ) ژى دياره وه‌كى (كوتان)ـان، ئه‌و ژى د خر و گروڤر بووينه، تنێ (گ)ێ (و) لدوى بێت ب هزرا من ئه‌ڤا مه گۆتى يا دروسته، لێ هه‌كه پيته‌كا دى لدوى (گ)ێ بيت ئه‌ڤ رێسايه ل سه‌ر جێبه‌جێ نابيت وه‌كى : گڤانده، گا، گر، گرين، گێره، گيسك، گێزك. هيڤيه شاره‌زا و زمانزانێت مه ڤى بابه‌تى زه‌نگين تر لێ بكه‌ن.
__________________________________
(1) گوزك: گوزكێ ئاڤێ يان (گوسك) ، زكێ وى يێ خروخره وه‌كى گووێ.
(2) گويزان: گويزانا سه‌ر تراشينێ، د كه‌ڤن دا وه‌كى (كڤان) ى بو نه‌يا (راست) بو وه‌كى يا نهو.
(3) گووڵ: گووڵا ئاڤێ، هه‌مى ده‌مان ره‌نگێ نێزى بازنه‌ى وه‌ردگريت.
(4) گولولك: گولولكا ريسى يان گولولكا به‌نكا.
(5) گوهـ: شێوێ نيڤ بازنه‌ى يه.
Leave a Reply