کورتیەک ل دوور پەرتووکخانا (کەریم فندی)

بنیاتێ ڤێ پەرتووکخانێ بۆ سالا 1958ێ ڤەدگەریت، دەمێ نڤیسەر و رەوشەنبیرێ ناڤدارێ کوردستانێ (کەریم فندی) ئێکەمین پەرتووک کری، وپاشان دەست بئاڤاکرنا پەرتووکخانەکا مەزن د مالا خۆ دا کری.

چەندین قوناغ و ژناڤچوون د سەر پەرتووکخانا ناڤبری را دەرباز بووینە، ژ وان:

– پشتی سەرهلدانا پیرۆز کو مللەتێ کورد ل باشوورێ کوردستانێ (هەرێما کورستانێ) بەرەڤ سنووران ڤە برێکەفتین، سەرەرای وێ چەندێ کو نڤیسەر و رەوشەنبیرێ کورد (کەریم فندی) چەندین پەرتووک دگەل خۆ برینە سەر سنووری و پاراستین و ل دەمێ ڤەگەریانێ دیسان ئەو پەرتووک دگەل خوە ڤەگەراندنەڤە ناڤ پەرتووکخانا خۆدا، لێ دەستەک و نەحەزێن کوردینی و رەوشەنبیریێ پەرتووکخانا ناڤبری گەلەک ژ ناڤ بربوو، لێ دیسان نڤیسەری دەست ب رێکخستن و زەنگینکرنا پەرتووکخانا خۆکرەڤە.

– پشتی ل سالا 1992ێ و وەرگرتنا بەرپرسیارەتی و پۆستێن فەرمی د حکومەتا هەرێما کوردستانێ دا ل هەولێرێ پشکەکا مەزن ژ پەرتووکخانا خۆ ڤەگوهاستە هەولێرێ و دیسان ل وێرێ ژی زێدەباری پەرتووکخانا خۆ ل باژێرێ دهۆکێ دەست دایە ئاڤاکرنا پەرتووکخانەکا دی یا تایبەت ل باژێرێ هەولێرێ. لێ پشتی شەرێ ناڤخۆ، هەمی پەرتووکخانا وی ل وی باژێرێ هاتە ژناڤچوون.

– پشتی نەمانا شەرێ ناڤخۆ و پێکئینانا حکومەتەکا ئێکگرتی ل هەولێرا پایتەختم دیسان نڤسیەری دەست دا ڤەگوهاستنا پشکەکا پەرتووکخانا خۆ بو هەولێرێ پێخەمەت ئاڤاکرنا پەرتووکخانەکێ ل وی باژێرێ کو ب هزارەهان پەرتووک بخۆڤە دگرتن، لێ ب مخابنیڤە پشتی ل سالا 2004ێ نەخۆش بووی ئەو پەرتووکخانا وی هەمی پرانی ژناڤ چوو.

– پشتی سالا 2005ێ دیسان ژ بو رێکوپێککرنا پەرتووکخانا وی ل باژێرێ دهۆکێ و نەبوونا جهی، هژمارەکا مەزن کو ب هزارەهان پەرتووک هاتنە ژ ناڤبرن.

– ل سالا 2006ێ هەم ژ بۆ پاراستنا پەرتووکخانێ ژ ناڤچوونێ وژلایەکێ دی ڤە ژی ژ بۆ خو گونجاندن دگەل تەکنەلۆجیا سەردەم وپتر خزمەتکرنا خوەندەڤانان، دەست ب دجیتالکرنا پەرتووکخانا ناڤبری هاتیە کرن. لێ ژ بەر چەندین ئاستەنگان کار گەلەک ب باشی ب رێڤەنەچوو.

ئەڤرۆ ئەم بەردەوامیێ دەیەینە ڤێ خزمەتێ و ب هەڤکاری و پشتەڤانیا نڤیسەر و خوەندەڤانان دێ بزاڤا وێ چەندێ کەین کو پەرتووکخانا ناڤبری زێدەباری هەر پەرتووکەکا ب شێوازێ دجیتال بکەڤیتە بەر دەستێ مە یان بو مە بێتە هنارتن دێ د ڤێ پەرتووکخانێ دا جهـ گریت و بێ بەرامبەر دێ ل بەر دەستێ خوەندەڤانان بیت.