د. عزەت فندی، ل سەر زمانێ کوردی دنڤیسیت – ٢٤

خه‌له‌كا 24
هه‌كه‌ ئه‌م ل په‌يڤێن cover و cup يێن ئنگليزی بنێرين، وه‌ك زمانه‌كێ هندو ئه‌وروپى دێ سه‌ر و سيمايێ گه‌له‌ك په‌يڤێن كورمانجى بينين كو بنه‌كوكا ڤان په‌يڤان دڤه‌گه‌رنه‌ سه‌ر ئێك كو ئه‌ڤ هه‌ردوو په‌يڤه‌ ب رامانا (نخافتن، په‌چنين، داپوشين) و (غطاء) ێ عه‌ره‌بى و په‌يڤا (قه‌پاغ) بخوڤه‌ ڤه‌دگرن، وه‌ك:١- كه‌په‌ن: ژ هريێ دهاته‌ چێكرن و وه‌كى (ساكوى) شڤانا ددانا سه‌ر ملێت خوه‌ و ژ سر و سه‌رما و به‌فرێ پێ دهاتنه‌ پاراستن.
٢- كورته‌ك: وه‌ك كراس و كورته‌كێت كوردى، كو ژنك كورته‌كى ب سه‌ر كراسى دا دكه‌نه‌ به‌ر خوه‌.
٣- كورتان: ب سازيه‌كا تايبه‌ت بو ده‌وارا دهاته‌ چێكرن كو پشتا ده‌وارى پێ دهاته‌ پاراستن، بو (بارهلگرتنێ).
٤- كاڤڵان: وه‌كى كاڤڵانێ شيرى و خه‌نجه‌رێ كو ئه‌ڤ هه‌ردوو (چه‌كه‌) دناڤدا پێ دهاتنه‌ پاراستن.
٥- كه‌ڤڵ: وه‌كى كه‌ڤڵێ چێلێ و بزنێ و مارى و هتد…
٦- كه‌ڤڵۆژانك: ئه‌و ژى وه‌كى كه‌ڤڵى، لێ بو ئادوى و مێروى و ڤان جوران دبێژنێ كه‌ڤڵوژانك.
٧- كورتانه‌: ده‌مێ ديوارێت (لبن)ـا دهاتنه‌ كورتانه‌كرن ژبه‌ر باران و باروڤا.
٨-كارتون: ب هزرا من بنواشێت ڤێ په‌يڤێ ژى هه‌ر بو بابه‌تێ مه‌ ڤه‌دگڕن.

هن جاران پیتا (ق)ـاف و (ك)ـاف جهێ خوه‌ د گهوڕن، و هه‌ر بو هه‌مان بنه‌ما ڤه‌دگه‌ڕيت، وه‌ك: 

٩- قاپووت: بو (كاپووت) ڤه‌دگه‌ڕيت.
١٠- قه‌پاغ: ئه‌و ژى بو (كه‌پاغ) ڤه‌دگه‌ڕيت.
١١- قه‌په‌پێچ: وه‌كى هنده‌ك تشت دهێنه‌ لێكدان و پێچان و د جهه‌كى دا دهێنه‌ هلگرتن، دبێژن (من يێت قه‌په‌پێچ كرين) ئانكو (كه‌په‌پێچ) كرين.
١٢- كوم: ب مه‌عنا كوڵاڤ.
١٣- قه‌رت: ڤه‌دگه‌ريته‌ سه‌ر بنه‌مايێ ( كه‌رت و كه‌پ ) ب رامانا (قه‌رتێ حه‌مالا) كو مرۆڤ ل سه‌ر پشتێ ددانن و بارى پێ هلدگرن.

تێبينى: ب هزرا من په‌يڤا (گووره‌) ژى هه‌ر بو بنه‌مايێ (كورته‌ك وكه‌رت و كوم) ڤه‌دگه‌ريت، و ئه‌ز دبێژم دبيت (گووره‌ و كووره‌ و كه‌وه‌ر و كه‌ڤه‌ر) د ئێك رێبار را چوينه‌، و هه‌تا ڤێ دوماهيێ (ده‌ستگورك) ژى ژێ په‌يدا بووى.

Leave a Reply

Your email address will not be published.